ނެޕް: 4 ދާއިރާއަކުން ސެޓްފިކެޓް ހަވާލުކޮށްފި

މިނިސްޓްރީ އޮފް ޔޫތު އެމްޕަވާމަންޓް، އިންފޮމޭޝަން އެންޑް އާރޓްސްގެ "ނެޝަނަލް އެޕްރެންޓިސްޝިޕް ޕްރޮގްރާމް"ގެ ދަށުން 4 ދާއިރާއަކުން ޒުވާނުންނަށް ސެޓްފިކެޓް ހާސިލްކޮށްފިއެވެ.

ބައިވެރިން ސެޓްފިކެޓް ހާސިލްކުރި ދާއިރާތައް:

- ނޭޝަނަލް ސެޓްފިކެޓް 3 އިން އިލެކްޓްރިކަލް އިންސްޓްލޭޝަން އެންޑް މެއިންޓެނަންސް

- ނޭޝަނަލް ސެޓްފިކެޓް 3 އިން ރެފްރިޖެރޭޝަން އެންޑް އެއަ- ކޮންޑިޝަނިން މެކޭނިކް

- ނޭޝަނަލް ސެޓްފިކެޓް 3 އިން މެރިން މެކޭނިކް

- ނޭޝަނަލް ސެޓްފިކެޓް 3 އިން އޮޓޯމޯޓިވް މެއިންޓެނަންސް

މިއީ އެސްޓީއޯ، އެފްއެސްއެމް، އަދި އެމް.ޕީ.އެލް އާ ގުޅިގެން ގެންދިޔަ ޕްރޮގްރާމްތަކެކެވެ.

ނެޝަނަލް އެޕްރެންޓިސްޝިޕް ޕްރޮގްރާމަކީ މަސައްކަތުގެ މާހައުލުގައި ތިބެގެން އެ މަސައްކަތުގެ ތަޖުތިބާކާރުންގެ ބެލުމުގެ ދަށުން މަސައްކަތްތައް ދަސްކޮށް، ތަމްރީނާއި ތަޖުރިބާ ހޯދުމުގެ ފުރުސަތު ގައުމީ ފެންވަރުގައި ހުޅުވާލައިގެން ކުރިއަށްގެންދާ ޕްރޮގްރާމެކެވެ.

މިޕްރޮގްރާމްތައް ހިންގާނީ މޯލްޑިވްސް ނެޝަނަލް ސްކިލްސް ޑިވެލޮޕްމެންޓް އޮތޯރިޓީގެ ނެޝަނަލް ސްޓޭންޑަރޑްތަކާ އެއްގޮތަށެވެ.

ނެޝަނަލް އެޕްރެންޓިސްޝިޕް ޕްރޮގްރާމްގެ ދަށުން ތަމްރީނުތައް ކުރިޔަށް ދާނީ މައިގަނޑު 6 ދާއިރާއަކަށް ހާއްސަ ކުރެވިގެންނެވެ. އޭގެ ތެރޭގައި ފަތުރުވެރިކަމުގެ ދާއިރާ، ދަތުރުފަތުރުގެ ދާއިރާ، އިމާރާތްކުރުމުގެ ދާއިރާ، އިޖްތިމާއީ ދާއިރާ، މަސްވެރިކަމާއި ދަނޑުވެރިކަމުގެ ދާއިރާ، އަދި އިންފޮމޭޝަން، ކޮމިޔުނިކޭޝަން ޓެކްނޮލޮޖީ ދާއިރާ ހިމެނެއެވެ.